Panceta de porco

A nosa panceta de porco elabórase baixo os estándares de calidade Fontefría, seguindo a receita tradicional herdada dos nosos antecesores.

É un produto cárnico porcino que provén de porcos seleccionados. Posteriormente o salgamos respectando os tempos e sistemas de outrora. Despois da salgadura e o secado, aplícaselle o sistema de conservación ao baleiro para que non perda as súas características organolépticas e poidas consumila sempre coa máxima calidade.

A panceta de porco é un produto cárnico que se pode consumir tanto en cru, en finos liscos acompañado de queixo por exemplo, como cociñado. Na gastronomía galega o touciño entrefebrado de porco está presente en multitude de pratos de culler, como o cocido, o caldo ou os callos. Este suculento produto engade moito sabor ás elaboracións xa que, está composto nun 85 ó 90% de graxa e só un 10 ó 15% de magro, polo que é un condimento contundente. Popularizouse o seu consumo tamén no verán, asándose á grella e acompañando ao resto de carnes do churrasco, ou como ingrediente de receitas nacionais e internacionais coma os torreznos ou a pasta carbonara.

Lembra consumir a cantidade diaria recomendada de carne para manter unha dieta sa e equilibrada segundo a Organización Mundial da Saúde.